Category: Uncategorized

Ужо паўгода Амерыканскі цэнтр праводзіць сустрэчы кніжнага клуба. Удзельнікі абмяркоўваюць не мастацкую літаратуру, але кнігі па лідэрстве, стратэгіі ды развіццю бізнесу. Натхняльнік і вядучы Business Book Club, саўладальнік e-commerce агенцтва World e-Com Ягор Расаў распавёў нам пра тое, як прыйшоў да чытання праз дыслексію, за што ён любіць амерыканскую бізнес-літаратуру, як пачаў весці кніжны клуб і даў некалькі парадаў тым, хто хоча стварыць свой.

Пра сябе, адукацыю ды працу

Мая сям’я родам з невялікага горада Багушэўск у Беларусі. У раннім узросце я выйграў стыпендыяльную праграму і пераехаў вучыцца ў Вялікабрытанію, дзе скончыў Універсітэт Лафбара па кірунку «Розніца, Маркетынг і Мэнэджмент» (адзін з лепшых універсітэтаў па версіі The Guardian) з адзнакай. Калі я вучыўся на бакалаўрыяце Лафбара, я ездзіў у ЗША па праграме акадэмічнай мабільнасці.

Я заснаваў і з’яўляюся саўладальнікам e-commerce агенцтва World e-Com, а таксама шэрагу іншых бізнесаў. Прадпрымальніцтвам, як асноўнай дзейнасцю, я займаюся з 2020 года. Да гэтага я працаваў дырэктарам па развіццю ў фінскай fashion-кампаніі, а таксама ў міжнародных кампаніях IBM і PwC. Дзякуючы магчымасцям дыстанцыйнай працы мне ўдалося пажыць у некалькіх краінах, а зараз я жыву ў Іспаніі.

Пра ЗША і працу з амерыканцамі

Апроч акадэмічнай мабільнасці падчас навучання ва ўніверсітэце, я шмат разоў бываў і нават жыў у ЗША – ездзіў з футбольнай камандай на тур па Новай Англіі, бегаў Нью-Ёрскі марафон, а яшчэ ездзіў на праграму Work and Travel USA. Кожны мой візіт у ЗША быў асаблівым.

Па працы ў мяне шмат амерыканскіх партнёраў і кліентаў, без іх мне было б складана ўявіць свой бізнэс і сваю кар’еру. Амерыканскі Цэнтр дае мне платформу для зносін з разумнымі людзьмі на цікавыя тэмы, мне вельмі сімпатычныя ўсе ўдзельнікі кніжнага клуба. Больш за тое, я бачу ў супрацоўніцтве з Амерыканскім цэнтрам магчымасць дапамагчы беларускаму кам’юніці энтузіястаў і прадпрымальнікаў, якія ўдасканальваюцца самастойна, і зрабіць унёсак у яго развіццё праз вывучэнне бізнес-літаратуры.

Пра чытанне і дыслексію

Канешне, чытаць важна. Ты пражываеш чужое жыццё, занураешся ў чужыя думкі, развіваеш у сабе абсалютна новыя кірункі мыслення. Але што да сталага чытання… Распавяду пра сябе сакрэт: я дыслексік*, таму я заўсёды ненавідзеў чытаць! Я заўсёды прымушаў сябе рабіць гэта праз сілу. Мне даводзілася чытаць адну і тую ж старонку па некалькі разоў. Потым я даведаўся пра спецыяльныя кнігі для дыслексікаў і маё жыццё змянілася да лепшага. Гэта спецыяльныя кнігі з няроўнымі літарамі і вялікім шрыфтам.

*Дыслексія – гэта асаблівасць успрымання інфармацыі, пры якой назіраецца выбарачнае парушэнне здольнасці да авалодання рознымі навыкамі (напрыклад, чытання і пісьма). Прасцей кажучы, у людзей з дыслексіяй узнікаюць цяжкасці ў «расшыфроўцы» слоў.

Пра тое, як чытаць больш

Я такі ж смяротны і разумею, што вакол шмат усяго, што адцягвае нашу ўвагу. Спраў заўсёды шмат, спакус яшчэ больш. Трэба сябе завабліваць, гэта як са спортам. У мяне на тэлефоне стаіць абмежаванне па сацыяльных сетках – 15 хвілін у дзень на ўсё пра ўсё. Яшчэ максімум 15 хвілін чытаю навіны на Bloomberg Business. А ў астатні вольны ад працы і хатніх спраў час я стараюся чытаць кнігі.

Пра стварэнне кніжнага клуба

Пасля заканчэння вучобы і падчас працы ў IBM, PwC, Mecaux і іншых фірмах я часта пазбягаў чытання, асабліва нон-фікшн літаратуры. Кніжкі для дыслексікаў цяжка знайсці, а часу ніколі няма. Але я ўсё ж вырашыў прымусіць сябе нарэшце чытаць штодзень. Каб не было магчымасці «саскочыць», я ўзяў на сябе адказнасць перад іншымі людзьмі. Так з’явілася ідэя зрабіць кніжны клуб, да сустрэч якога трэба рыхтавацца, чытаць матэрыял і аналізаваць яго. Гэта дапамагае запамінаць кнігі.

Пра кніжны клуб, прысвечаны бізнес-літаратуры

Я абраў гэтую сферу, таму што яна мне найбольш цікавая, а яшчэ таму, што яна дапамагае развівацца. Мне падаецца ўсе бізнес-кнігі можна падзяліць на дзве катэгорыі: больш практычныя і больш тэарэтычныя.

Практычныя дапамагаюць нам вучыцца на чужым досведзе, на чужых памылках, фармаваць нагляднасць неабходную ва ўсіх сферах дзейнасці. Сярод практычных хацеў бы адзначыць «Ілан Маск. Біяграфія» ад Уолтара Айзэксана і «Прадавец абутку» Філа Найта.

А тэарэтычныя фармуюць новы спосаб мыслення, новыя тэорыі, структуруюць досвед у галаве. Сярод тэарэтычных я б адзначыў «Сем навыкаў высокаэфектыўных людзей» ад Стывена Кові і «Рызыкуючы ўласнай скурай» ад Насім Талеба.

Пра практычную карысць бізнес-літаратуры

Я прачытаў шмат кніг і ўпэўнены, што яны мне вельмі дапамаглі. Як мінімум я стаў думаць шырэй, у мяне з’явіліся новыя арыенціры. Больш за тое, многія рэчы з кніг я ўжыў у сваёй кар’еры і ў бізнесе, асабліва тыя, што звязаныя з продажамі і менеджментам персаналу.

Колькі б вы ні чыталі, трэба заўсёды памятаць, што азнаямлення недастаткова, трэба прымушаць сябе прымяняць ідэі з кніг у жыцці. Гэта, зноў жа, як з заняткам спортам – за адзін падыход не схуднееш, трэба пастаянна трэніравацца. Таксама неабходна трэніраваць мышцу мозгу, менавіта праз імплементацыі ідэй з кніг.

Пра амерыканскую бізнес-літаратуру

Я заўсёды стараюся чытаць у арыгінале, калі гэта магчыма. Амерыканская бізнес-літаратура мне заўсёды падабалася больш за астатнія. Амерыка мяне ў сябе закахала тым, што ў гутарках, як і ў літаратуры пра бізнес, няма ніякай сарамлівасці, усё вельмі адкрыта. У кнігах шмат практычнага досведу, людзі з бізнесу кажуць пра свае пачуцці, трывогі, сумневы, таму пражываеш досведы бізнесмэнаў з Амерыкі паўнавартасна.

Пра Business Book Club Амерыканскага цэнтра

Водгукі ад удзельнікаў клуба мне вельмі прыемныя. Многія прыходзяць і актыўна ўдзельнічаюць кожны тыдзень, вядуць цікавыя дыскусіі і адкрываюць для мяне новыя погляды на тыя кнігі, якія я ўжо, здавалася б, абдумаў поўнасцю. Кніжкі чытаюць не ўсе, але гэта неабавязкова, бо асноўныя ідэі кнігі я расказваю ў прамежках паміж абмеркаваннямі ў breakout rooms. Таму прыходзьце нават калі не паспееце прачытаць кнігу да абмеркавання!

Вось якія кнігі мы ўжо паспелі абмеркаваць: «7 звычак высокаэфектыўных людзей» Стывена Кові, «Радыкальная шчырасць. Як кіраваць не губляючы чалавечнасці» Кіма Скота, «Ніякіх кампрамісаў. Вядзі перамовы так, нібы ад іх залежыць тваё жыццё» Крыстафера Восса і Тал Раз, «Прадавец абутку. Гісторыя кампаніі Nike, расказаная яе заснавальнікам» Найта Філа, «Не бойся дзейнічаць. Жанчына, праца і воля да лідэрства» Шэрыл Сэндберг, «Багаты тата – бедны тата» Роберта Кіёсакі і Шэран Лехтэр, «Стратэгія блакітнага акіяна» Рэнэ Маборгне і В. Чан Кіма, «Як заваёўваць сяброў і аказваць уплыў на людзей» Дэйла Карнэгі ды «Becoming. Мая гісторыя» Мішэль Абамы.

А вось якія кнігі мы будзем абмяркоўваць на наступных сустрэчах:

1. «Ніякіх правілаў. Унікальная культура Netflix» Хастынгс Рыд, Мэер Эрын;

2. «Губляючы нявіннасць: Як я пабудаваў бізнес, робячы ўсё па-свойму і атрымліваючы задавальненне ад жыцця» Рычарда Брэнсана;

3. «Чорны лебедзь» Насіма Нікаласа Талеба;

4. «Уліце ў яе сваё сэрца. Як кубак за кубкам будаваўся Starbucks» Говарда Шульца і Доры Джонс Йенг;

5. «Псіхалогія ўплыву» Роберта Чалдзіні.

Далучайцеся! Зарэгістравацца можна па спасылцы.

Парады тым, хто хоча стварыць свой кніжны клуб

1. Не варта брацца за кніжны клуб, калі вы не гатовыя чытаць процьму кніг і рабіць дэталёвыя нататкі па іх. Чытаць кароткі змест будзе недастаткова, удзельнікі вас хутка раскусяць і нічога не атрымаецца. На чытанне і нататкі сыходзіць багата часу. Трэба быць да гэтага гатовым!

2. Кніжны клуб, як і ва ўсё, у што вы ўкладаецеся, трэба любіць. Кожны раз рыхтаваць матэрыял і прэзентацыі, на гэта ідзе шмат часу. Калі гэта не любіць, то нічога не атрымаецца.

3. Апроч чытання трэба яшчэ паспяхова весці сустрэчы. Каб усё ішло добра, трэба абавязкова даваць магчымасць удзельнікам узаемадзейнічаць і абмяркоўваць ідэі з кніг.

4. Эйнштэйну прыпісваюць словы: «Калі вы нешта не можаце растлумачыць 6-гадоваму дзіцяці, вы самі гэтага не разумееце». Не ведаю, ці казаў ён гэтыя словы, але гэта праўда. Трэба вельмі дэталёва разумець ідэі кніг, каб якасна іх пераказваць простымі словамі. Каб удзельнікі сустрэчы, якія не прачыталі кнігу, маглі за кароткі час зразумець яе сутнасць і ўдзельнічаць у абмеркаванні.

5. Удзел у кніжных клубах дазваляе людзям даведвацца розныя меркаванні аб кнігах. Параўнанне урокаў з кніг з асабістым досведам у бізнесе і кар’еры гуляе важную ролю для іх. Таму вельмі важна спасылацца на свой уласны досвед у абмеркаваннях.

Праграма OPEN прапануе бясплатныя анлайн-курсы англійскай мовы працягласцю ад 5 да 12 тыдняў. Для самастойнага праходжання зараз адкрыты рэгістрацыі на 2 курсы:

Developing and Teaching Academic Writing Courses

Курс «Распрацоўка і выкладанне акадэмічнага пісьма» прызначаны для таго, каб дапамагчы слухачам лепш зразумець розныя падыходы, тыпы і ключавыя кампаненты курсаў акадэмічнага пісьма. У рамках гэтага курса ўдзельнікі распрацуюць кантэкстуалізаваныя навучальныя матэрыялы для курсаў акадэмічнага пісьма ў класе англійскай як замежнай.

Рэгістрацыя заканчваецца 24 чэрвеня 2024 года.

Зарэгістравацца можна па спасылцы: https://nomination.openenglishprograms.org/ParticipantProfile/WelcomeSurvey/2f4cb3ce5b3a4f36076908dc559be75c 

TESOL Methods

Курс накіраваны на выкладчыкаў і дае сучасныя методыкі навучання англійскай вучняў розных узростаў і кантэкстаў. Вы будзеце вывучаць лепшыя практыкі навучання аўдзіраванню, маўленню, чытанню і пісьму, уключаючы граматыку і слоўнікавы запас, і даведаецеся, як стварыць эфектыўнае камунікатыўнае моўнае асяроддзе для ўсіх навучэнцаў.

Рэгістрацыя заканчваецца 12 жніўня 2024 года.

Зарэгістравацца можна па спасылцы: https://nomination.openenglishprograms.org/ParticipantProfile/WelcomeSurvey/2209e84120904df2deb908dc872fe328 

Часопіс English Teaching Forum 2024, Volume 62, Number 1

Новы выпуск часопіса прысвечаны гульням і таму, як яны дапамагаюць у выкладанні англійскай. У выпуску вы знойдзеце артыкулы пра тое, як гульня «пытанне-адказ» паляпшае навыкі чытання, скіл пастаноўкі пытанняў і аналізу; крэатыўныя ідэі па выкарыстанні сацсеткі X для пераказу падзей; прапановы па ператварэнні сцен у класе ў гульнявыя дошкі; гайд па арганізацыі навучання, заснаваны на Сямі цудах свету і многае іншае.

Азнаёміцца ​​з выпускам можна па спасылцы: https://americanenglish.state.gov/resources/english-teaching-forum-2024-volume-62-number-1  

А вы ведаеце, чым адрозніваецца амерыканскі каледж ад універсітэта? Прыходзьце на анлайн-сустрэчу EducationUSA Belarus са студэнткай каледжа Ліхайскага ўніверсітэта Алексай Круз каб даведацца больш!

Каледжы ў ЗША – гэта шырокі спектр навучальных устаноў, але аб’ядноўвае іх той факт, што яны накіраваны толькі на навучанне прафесіі, без даследчай або навуковай дзейнасці. Ва ўніверсітэтах жа не толькі выкладаюць праграмы бакалаўрыяту, магістратуры і аспірантуры, але і праводзяць даследчую або навуковую працу.

Алекса Круз вывучае псіхалогію і мастацтва ў каледжы Ліхайскага ўніверсітэта, а цяпер знаходзіцца ў Вільні ў якасці стажоркі American Councils. На сустрэчы Алекса распавядзе пра працэс паступлення ў амерыканскі каледж – ад тэрмінаў і фармату падачы заяўкі да падрыхтоўкі рэкамендацыйных лістоў.

Сустрэча пройдзе 27 чэрвеня а 17:00 паводле мінскага часу.

Зарэгістравацца

Ці задумваліся вы над тым, адкуль бяруцца грамадзянскія рухі? Чаму адны з іх з’яўляюцца і знікаюць, а іншыя – змяняюць гісторыю цэлых народаў? Каб пагрузіцца ў гэтую гістарычную вобласць, запрашаем вас прайсці курс аб грамадзянскіх правах у ЗША, які падрыхтаваў для аўдыторыі Амерыканскага цэнтра прафесар універсітэта Паўночнай Караліны і намінант Пулітцэраўскай прэміі Дэвід Голдфілд!

На курсе вы даведаецеся, як адмянілі рабства, як змагаліся за свае правы жанчыны і мігранты, як пераадольвалі расавую сегрэгацыю, што важнага здарылася падчас прэзідэнцтва Абамы і чаму Black live matters ускалыхнуў ЗША.

Курс складаецца з 7 відэа-лекцый прафесара Голдфілда, а таксама вялікіх і падрабязных спісаў дадатковых матэрыялаў са спасылкамі (кнігі, артыкулы, відэа), якія дапамогуць вам глыбей пагрузіцца ў тэму занятку.

Доступ да курса вы знойдзеце па спасылцы. Поспехаў!

На чарговай сустрэчы Business Book Club з Ягорам Расавым абмяркуем кнігу Мішэль Абамы «Becoming» («Станаўленне»).

«Справа не ў тым, каб быць дасканалымі. І не ў тым, дзе вы апынецеся ў рэшце рэшт. Проста ёсць асаблівая моц у тым, каб заявіць пра сябе, расказаць сваю ўнікальную гісторыю, падзяліцца ўласным бачаннем. А ў жаданні пазнаваць і чуць іншых ёсць асаблівая высакароднасць. Вось так, па-мойму, мы і становімся людзьмі».

«Becoming» – вельмі шчырае і глыбока асабістае апавяданне былой першай лэдзі ЗША, якое апісвае яе шлях ад юнацтва ў Чыкага да жыцця ў Белым доме. Кніга напоўнена ўрокамі сілы, надзеі і станаўлення ўласнай асобы.

Ягор Расаў разам з удзельнікамі клуба абмяркуюць галоўныя канцэпты кнігі, падзеляцца ўражаннямі і абмяркуюць, як прынцыпы і гісторыі са «Станаўлення» могуць натхніць і падтрымаць кожнага з нас на ўласным шляху. 

Не саромейцеся далучацца нават калі вы не чыталі ці не паспяваеце прачытаць кнігу, сустрэчы праходзяць у інтэрактыўнай форме і вы зможаце папрактыкавацца ў англійскай, абмяркоўваючы карысную і добрую літаратуру.

20 чэрвеня зноў сустракаемся ў нашым Business Book Club! Гэтым разам будзем адчыняць для сябе сакрэты поспеху Netflix! 

На чарговай сустрэчы кніжнага клуба Амерыканскага цэнтра з Ягорам Расавым абмяркуем кнігу «No Rules Rules: Netflix and the Culture of Reinvention» Эрын Мэер і Рыда Хастынгса.

Культура Netflix унікальная. У ёй чалавек стаіць вышэй за працэсы, а інавацыі – вышэй за эфектыўнасць. Супрацоўнікам плацяць вышэй за рынак, але могуць звольніць (са шчодрай выходнай дапамогай) за добрую працу, таму што чакаюць выбітнай. На любым узроўні патрабуюць даваць і прымаць зваротную сувязь, а ўзамен даюць поўную свабоду: не трэба ўзгадняць свой адпачынак і строга даваць справаздачу за камандзіровачныя выдаткі. Рашэнні прымаюць зыходзячы з выгоды кампаніі, а не з-за меркавання начальніка.

Як гэта працуе і як выглядае знутры, распавядаюць сузаснавальнік Netflix Рыд Хастынгс і яго суаўтар – прафесар INSEAD Эрын Мэер, якая правяла мноства інтэрв’ю з былымі і цяперашнімі супрацоўнікамі кампаніі. Кніга натхняе і дазваляе па-новаму зірнуць на мэты і сродкі сучасных арганізацый, кадравую палітыку і шматлікае іншае.

Вясной 2024 года, каб падтрымаць мастакоў у эміграцыі, Амерыканскі цэнтр арганізаваў для іх серыю сустрэч з псіхолагам. У сустрэчах прынялі ўдзел 23 чалавекі – мастакі, скульптары, музыканты, фатографы, дызайнеры – рознага ўзросту (ад 19 да 76 гадоў) і з розным досведам працы з псіхолагам. Для некаторых гэта быў першы досвед такога ўзаемадзеяння. Яны дзяліліся тым, што ў іх былі стэрэатыпныя ўяўленні пра псіхалагічнае кансультаванне, але пасля ўдзелу ў групе іх прадстаўлення змяніліся і яны выказвалі падзяку за такую ​​магчымасць.

Падчас сустрэч мастакі абмяркоўвалі ў групах розныя тэмы, такія як: адаптацыя ў эміграцыі, адаптацыя ў крызісных сітуацыях, як перажываць няпростыя моманты ў жыцці, як спраўляцца з траўматычнымі падзеямі, як дапамагаць спраўляцца з эміграцыяй сваім дзецям і як дапамагаць сабе. Таксама ўдзельнікі разам выконвалі псіхалагічныя практыкаванні.

Псіхолаг Віялета Нікіцік, грамадзянка ЗША, з якой працавалі ўдзельнікі, падзялілася з намі вопытам гэтага ўзаемадзеяння:

«Для мяне было важным стварыць бяспечную атмасферу на трэнінгах, даць магчымасць удзельнікам казаць пра свае перажыванні звязаныя з эміграцыяй ці жыццём у Беларусі ў прымаючым асяроддзі. Удзельнікі адзначылі, што ім стала лягчэй таму, што яны не адзінокія ў сваіх перажываннях; адзначылі, што ў групе такіх жа творчых удзельнікаў ім лягчэй прад’яўляцца, гаварыць пра сябе і з вялікай цікавасцю слухаць іншых. Менавіта псіхалагічныя трэнінгі дапамаглі ім бліжэй пазнаёміцца ​​адзін з адным і стварыць блізкія, цёплыя, даверныя адносіны паміж сабой, што ўмацоўвае іх камунікацыю пасля завяршэння рэзідэнцый і трэнінгаў, гэта асабліва спрыяльна ўплывае на сацыяльную адаптацыю ў эміграцыі.

Таксама ўдзельнікі адзначылі, што кантактаванне і ўзаемадзеянні на псіхалагічных трэнінгах дапамагаюць ім знізіць міжасобасную канкурэнцыю і напружанне ў камунікацыі, таму што яны таксама хутчэй пачынаюць бачыць і ўспрымаць іншых удзельнікаў як блізкіх людзей, а не канкурэнтаў, “чужых”.

Такія праграмы важныя і патрэбныя для творчых людзей, асабліва ў пачатку іх адаптацыі ў новай краіне – для дапамогі ў псіхалагічнай самарэгуляцыі, атрымання групавой падтрымкі, умацаванні сацыялізацыі і прафілактыкі дэпрэсіўных настрояў».

Вясной 2024 года Амерыканскі цэнтр арганізаваў курс англійскай мовы для людзей творчых прафесій – мастакоў, фатографаў, артыстаў, пісьменнікаў і іншых прафесіяналаў з крэатыўных індустрый.

Курс вяла выкладчыца Вэндзі Сцюард. Яна нарадзілася ў Флорыдзе, але большую частку свайго жыцця правяла за мяжой, працуючы ў сферы міжнароднай адукацыі.

Маючы больш за дзесяць гадоў прафесійнага досведу за плячыма, яна з поспехам навучала студэнтаў у розных навучальных установах па ўсім свеце.

Вэндзі дапамагала ўдзельнікам курса авалодаць прафесійнай лексікай, вучыцца пісаць артыстычныя біяграфіі і матывацыйны лісты; ствараць кантэнт для сваіх сацсетак і сайтаў на англійскай мове; распрацоўваць грантавыя заяўкі і асвойваць дзелавую камунікацыю ў свеце мастацтва.

Мы папрасілі фатографа Яўгена Aтцецкага, аднаго з удзельнікаў, падзяліцца ўражаннямі ад праходжання курса. Вось што ён напісаў:

Цяпер, калі многія беларускія аўтары знаходзяцца ў вымушанай эміграцыі, як ніколі важная камунікацыя на англійскай мове. Англійская сёння – гэта новыя сувязі і дзелавыя перамовы, гэта магчымасці і новыя праекты. Праграма мінімум для сучаснага мастака: біяграфія, CV, партфоліа. Вельмі карыснымі з’яўляюцца навыкі дзелавой перапіскі і запаўнення заявак.

Менавіта гэтым мы і займаліся на курсе і падчас дамашніх заданняў. Апошнія былі вельмі карыснымі. Спачатку ты звяртаешся да сябе, а пасля афармляеш яшчэ ўсё гэта на англійскай. Складана, патрабуе часу, але якое прыносіць задавальненне і вынік.

На самім курсе няма ні слова па-руску ці па-беларуску. Вельмі важна пагрузіцца ў асяроддзе. Калі ты паўтары гадзіны слухаеш англійскую мову, яе рытм, гучанне становяцца звыклымі, а словы і фразы больш зразумелымі.

Кожны з нас меў магчымасць выказвацца, рэагаваць на зададзеныя выкладчыцай тэмы. А гэта значыць мець вельмі важную практыку гаварэння.

Асобны дзякуй хочацца сказаць Вэндзі за зваротную сувязь і дасведчаную арганізацыю заняткаў, а Амерыканскаму цэнтру ў Мінску – за магчымасць навучацца англійскай ў асяроддзі аднадумцаў пад кіраўніцтвам выдатнай выкладчыцы

Разам з Ягорам Расавым, вядучым BBC з багатым досведам у галіне маркетынгу, менеджменту і глабальнага гандлю, удзельнікі абмяркуюць 9 кніг, якія сталі знакавымі падзеямі ў бізнес-літаратуры. Удзел у Business Book Club – унікальная магчымасць не толькі палепшыць англійскую і атрымаць новыя веды, але і пашырыць кола аднадумцаў, лічыць Ягор.

Першая сустрэча была прысвечана бэстсэлеру «Багаты тата, бедны тата» Роберта Кіясакі і Шэран Лехтэр. Гэтая кніга ў свой час перавярнула ўяўленне аб фінансавай пісьменнасці і шляху да фінансавай незалежнасці.

На другой сустрэчы ўдзельнікі абмяркоўвалі кнігу «Стратэгія блакітнага акіяна» Рэнэ Маборн і У. Чан Кіма. Аўтары «Стратэгіі» ўпэўненыя – трэба адысці ў бок і прыдумаць нешта зусім новае. І тады ў спакойных водах «Блакітнага акіяна» ваш бізнес будзе расці.

Трэцяя дыскусія будзе прысвечана вечнай класіцы – «Як заваёўваць сяброў і аказваць уплыў на людзей» Дэйла Карнегі. Гэтая кніга – сапраўдная скарбніца ведаў па майстэрстве зносін, якая ўжо дзесяцігоддзі дапамагае людзям дасягаць поспеху ў жыцці і кар’еры. Удзельнікі абмяркуюць ключавыя прынцыпы і прыёмы, апісаныя Карнегі, і падзеляцца думкамі аб тым, як прымяняць іх у сучасным свеце.

За анонсамі наступных сустрэч Business Book Club сачыце ў нашых сацыяльных сетках!

Развіццё білінгвізму і мультылінгвізму ў апошнія гады выклікае ўсё большую цікавасць сярод бацькоў і выкладчыкаў. Усё з-за таго, што білінгвізм і мультылінгвізм аказваюць глыбокі ўплыў на кагнітыўнае, моўнае і сацыя-эмацыйнае развіццё дзіцяці. Якія перавагі дае ранняе вывучэнне моў? Якія механізмы дапамагаюць дзецям вывучаць мовы так хутка? Пра гэта чытайце ў канспекце выступу прафесара ў галіне адукацыі Анджэлы Пальмеры, якая правяла лекцыю ў рамках праекту «Raising multilingual children».

Да асноўных пераваг ранняга вывучэння моў дзецьмі прафесар Пальмеры адносіць:

1. Кагнітыўныя перавагі.

Высокія арганізатарскія функцыі. Дзеці, якія вывучаюць некалькі моў, лепш вырашаюць праблемы ў розных галінах жыцця, дэманструюць кагнітыўную гнуткасць і добрую канцэнтрацыю, што абумоўлена неабходнасцю пераключацца паміж некалькімі мовамі.

Развітая моўная свядомасць. “Паглыбленне” ў некалькі лінгвістычных структур спрыяе развіццю металінгвістычнай свядомасці ў дзіцяці, дазваляючы яму ўсведамляць мову як сістэму з рознымі правіламі і ўзорамі.

2. Лінгвістычныя перавагі. 

Паскоранае вывучэнне мовы. У маленькіх дзяцей высокая нейрапластычнасць, што палягчае вывучэнне новых моў нават пры адначасовым выкарыстанні некалькіх моў. Багаты слоўнікавы запас. Мультылінгвізм узбагачае слоўнікавы запас дзіцяці ў цэлым і пашырае агульны лінгвістычны рэпертуар.

3. Культурныя і сацыяльныя перавагі.

Культурная кампетэнтнасць. Шматмоўе спрыяе культурнаму разуменню, развіваючы эмпатыю і павагу да розных поглядаў. Развітыя сацыяльныя навыкі. Мультымоўныя дзеці часта дэманструюць уменне мець зносіны без аглядкі на культурныя межы, што палягчае міжасабовыя і міжкультурныя сувязі.

4. Кагнітыўны рэзерв і нейраабарона.

Кагнітыўны рэзерв. Веданне некалькіх моў уплывае на кагнітыўны рэзерв – здольнасць мозгу спраўляцца з яго пашкоджаннямі ў выніку інсультаў і траўмаў, і нейрадэгенератыўнымі захворваннямі ў сталым веку.

Нейраабарона. Пастаянная практыка мультылінгвізму можа аказваць нейраабароннае дзеянне, спрыяючы ўстойлівасці мозгу ў сувязі з узроставым зніжэннем кагнітыўных функцый.

Як маленькія дзеці вучаць мовы:

1. Засваенне мовы немаўлятамі.

Сэнсаматорная стадыя. Немаўляты першапачаткова асвойваюць мову праз сэнсарна-маторныя ўзаемадзеянні, распазнаючы маўленчыя гукі і патэрны з дапамогай аўдыё- і візуальных стымулаў.

Лепет (мармытанне) і імітацыя. Дзіцячы лепет (мармытанне) – папярэднік маўлення, які з’яўляецца спробай немаўляці выдаваць гукі і жэстыкуляваць. А імітацыя – вывучэнне мовы праз перайманне гаворкі сваіх бацькоў (апекуноў).

2. Развіццё маўлення ў раннім дзяцінстве.

Сацыяльнае ўзаемадзеянне. Засваенне мовы моцна залежыць ад сацыяльнага ўзаемадзеяння, а бацькі (апекуны) выступаюць у якасці ролевай мадэлі для дзіцяці. Яно асвойвае маўленне праз інтэрактыўнае і вербальнае ўзаемадзеянне са сваімі значнымі фігурамі.

Варыятыўнасць атрымання інфармацыі. Дзіцяці важна атрымліваць разнастайную маўленчую інфармацыю на некалькіх мовах, што спрыяе моўнай дыферэнцыяцыі, дазваляючы дзецям адрозніваць мовы адна ад адной.

3. Развіццё білінгвізму і мультылінгвізму

Пераключэнне моўнага кода і змешванне моў. Білінгвы і мультылінгвы пераходзяць з мовы на мову праз пераключэнне кодаў, адаптуючы свой моўны рэпертуар да камунікатыўных кантэкстаў і суразмоўцаў.

Моўнае дамінаванне. Узроўні валодання дзвюма і больш мовамі могуць вар’іравацца. На гэта ўплываюць такія фактары, як моўнае ўздзеянне, прыклады выкарыстання і сацыяльны кантэкст.

Крытычны перыяд засваення другой мовы. Крытычны перыяд – гэта ўзроставы перыяд, калі дзеці “без намаганняў” засвойваюць мовы. Як правіла, ён пачынаецца ў раннім дзяцінстве і змяншаецца з прыбліжэннем падлеткавага ўзросту. Гэта перыяд павышанай нейрапластычнасці і здольнасці да вывучэння моў. Даследаванні паказваюць, што на працягу гэтага перыяду мозг дэманструе вялікую гнуткасць у апрацоўцы і засваенні моўнага матэрыялу, што прыводзіць да больш эфектыўнага засваення мовы.

Набыццё “правільнага” акцэнту, граматычнай кампетэнтнасці і валоданне мовай на ўзроўні носьбіта даецца дзецям лягчэй, калі навучанне адбываецца на працягу гэтага крытычнага перыяду. Хаця дзеці могуць працягваць вывучаць мовы і пасля гэтага перыяду, лёгкасць, з якімі яны гэта робяць, будзе памяншацца. Разуменне важнасці крытычнага перыяду пры засваенні другой (і больш) мовы падкрэслівае важнасць ранняга паглыблення ў шматмоўнае асяроддзе.

Заключэнне

Мультылінгвізм дае шматлікія кагнітыўныя, лінгвістычныя і сацыя-эмацыйныя перавагі для развіцця маленькіх дзяцей, узбагачаючы іх разуменне свету. Веданне механізмаў вывучэння моў у раннім дзяцінстве фарміруе стратэгіі для аптымізацыі навучальнага асяроддзя і развіцця мультылінгвізму з ранняга ўзросту.

Карысныя рэсурсы:

Мозг білінгваў: https://youtu.be/nzHY-muy2Mw?feature=shared

Перавагі білінгвальнага мозгу: https://youtu.be/MMmOLN5zBLY?feature=shared

Перавагі валодання дзвюма мовамі: https://youtu.be/eAqVR4JQITc?feature=shared\

Літаратура:

Foundations for Multilingualism in Education: З Principles to Practice

by Ester J. De Jong

Для IT-прафесіяналак c (невялікім) досведам працы з кодам (праграмістак, тэстыроўшчыц, дата-аналітыкаў і інш.) Амерыканскі цэнтр запусціў ментарскую праграму, якая дапаможа ім пашырыць свае веды аб тэхналогіях і падыходах у тэхіндустрыі.

Праграма дапаможа жанчынам у развіцці іх прафесійных навыкаў, як тэхнічных, так і soft skills. Першыя ўключаюць праграмаванне, воблачныя сэрвісы, выкарыстанне сістэм кантролю версій, знаёмства з лепшымі практыкамі і іх пошук. Развіць soft skills праграма дапаможа ў напрамку камунікацый і кіравання камандамі, а таксама паляпшэння лідэрскіх навыкаў.

Таксама ментарская праграма Амерыканскага цэнтра накіравана на дапамогу жанчынам у іх кар’ерным развіцці (разуменні свайго кар’ернага шляху ў цэлым і гатоўнасці да прасоўвання і змены роляў) і пашырэнні нэтворка.

Мэнтарам праграмы выступае Ігнат Крышчык. Ігнат – дасведчаны распрацоўшчык і архітэктар з амаль дзесяцігадовым стажам у галіне распрацоўкі праграмнага забеспячэння. Падыходзячы са шчырым энтузіязмам да стварэння прадуктаў і выбудоўвання працэсаў, ён унёс прыкметны ўклад у дасягненні некалькіх кампаніях. Ігнат паспеў папрацаваць у вялізнай Itransition, невялікай CreativeIT, а таксама як прыватны падрадчык. Цяпер Ігнат праектуе і працуе над новым прадуктам для Third Financial, які базуецца ў Сіці Лондана.

У пачатку 2024 года Амерыканскі цэнтр арганізаваў курс англійскай мовы для праваабаронцаў. Удзельнікі курса пазнаёміліся са спецыялізаванай лексікай, юрыдычнымі тэрмінамі, міжнароднымі канвенцыямі і структурамі міжнароднага права. Студэнты ўбачылі тыя праблемы і выклікі, якія стаяць перад праваабаронцамі, а таксама асвоілі слоўнік і тэрміналогію для апісання парушэнняў і абароны правоў чалавека.

Выкладчыцай курса выступіла Анэлі Арана, прафесарка ўніверсітэта з Фларыды. Анэлі падзялілася ўражаннямі ад працы са студэнтамі на гэтым курсе:

«Мне вельмі спадабалася выкладаць курс англійскай мовы для праваабаронцаў. Мы не толькі вывучалі лексіку, звязаную з прававой сістэмай, але і занураліся ў розныя пытанні, звязаныя з правамі чалавека ва ўсім свеце.

Кульмінацыяй курса сталі заключныя прэзентацыі, падчас якіх студэнты выступілі ў фармаце Ted Talk з дакладамі на праваабарончыя тэмы, якія ім цікавыя.

На курсе былі студэнты з Беларусі і Арменіі. Усе былі вельмі захопленыя на працягу ўсяго курса і імкнуліся падзяліцца сваім досведам адзін з адным».

Доктар Эдыт Эспарза Янг мае трыццацігадовы досвед выкладання і працуе зараз каардынатарам па двухмоўным навучанні і настаўнікам англійскай (як другой) мовы ў Тэхасе. Яна працавала спецыялістам па англійскай мове ў Іспаніі, а таксама знешнім экспертам у Злучаных Штатах і па ўсім свеце. Цяпер Эдыт Эспарза Янг атрымлівае ступень магістра ў галіне кансультавання па пытаннях псіхічнага здароўя.

Родная мова Эдыт Эспарзы іспанская, але яна таксама вывучала нямецкую, французскую і рускую мовы.

Для аўдыторыі Амерыканскага цэнтра доктар Янг правяла вэбінар аб тым, якія практыкі могуць дапамагчы бацькам у выхаванні шматмоўнага дзіцяці. Прыводзім асноўныя тэзісы яе выступу.

Доктар Патрыцыя Кул (Patricia Kuhl) з Універсітэта Вашынгтона кажа, што немаўляты – гэта грамадзяне свету. Кожны раз, калі яны чуюць нейкую мову, яны фактычна «збіраюць статыстычныя дадзеныя».

⦿ Лабараторныя даследаванні, якія ўключаюць сканаванне мозгу, паказваюць, як шасцімесячныя немаўляты выкарыстоўваюць складаныя лагічныя прыёмы каб зразумець навакольных свет.

⦿ Важна памятаць, што для таго, каб суполка ці група маглі падтрымліваць і захоўваць мову жывой, на гэтай мове трэба размаўляць.

⦿ Мозг – адзіны орган, які працягвае расці пасля нашага нараджэння.

На думку лагапедаў, існуе мноства міфаў аб тым, што адбываецца, калі мы выхоўваем двухмоўных дзяцей. Вось некалькі рэчаў, пра якія трэба памятаць:

⦿ Бацькі ці выхавальнікі павінны выкарыстоўваць мову, якую яны ведаюць лепш за астатнія.

⦿ Навыкі пісьменнасці перадаюцца з адной мовы на іншую.

⦿  Дзеці не будуць збітыя з панталыку, калі ў сям’і будуць размаўляць на некалькіх мовах, і ніякіх затрымак у развіцці ў дзяцей, якія растуць у шматмоўнай сям’і, не будзе.

⦿  Калі дзеці бачаць нейкі аб’ект, яны разумеюць канцэпт гэтага аб’екта. Па меры асаваення мовы, яны прымацоўваюць да гэтага канцэпта ярлык на вызначанай мове. Напрыклад, гледзячы на дрэва, дзеці бачаць яго як канцэпт і затым «вешаюць» на яго слоўныя ярылыкі на розных мовах.

⦿ Бацькі могуць дапамагчы дзецям, літаральна выкарыстоўваючы ярылкі ў доме. Напрыклад, развешваць на розныя прадметы стыкеры рознага колеру на розных мовах. Напрыклад, зялёныя стыкеры са словамі на англійскай мове, жоўтыя – на беларускай і г.д.

⦿ Засваенне мовы адбываецца ў розных частках мозгу. Вось чаму так важна, каб дзеці гулялі, былі ўцягнутыя ў неструктураваныя гульні, якія з’яўляюцца часткай руціных дзеянняў, такіх як прыгатаванне ежы ці, напрыклад, спевы.

⦿ Даследаванні паказваюць, што засваенне мовы – гэта не проста новыя словы, не проста працэсы ў нашым мозгу, гэта значна больш. Гэта тое, як мы сябе адчуваем. Усе мы памятаем настаўнікаў, якія давалі нам адчуваць сябе выдатна, і ўсе мы памятаем настаўнікаў, якія наадварот – не давалі нам адчуваць сябе добра. Калі мы не адчуваем сябе расслаблена, працэс будзе ісці з цяжкасцю. Калі мы адчуваем стрэс, спрабуючы вывучыць нешта, інфармацыя будзе даходзіць з перашкодамі. Менавіта таму вельмі важна адчуваць камфорт, радасць і натхненне, вывучаючы новую мову, асабліва дома.

⦿ Гульні на вуліцы з’яўляюцца для дзяцей важнай часткай сацыяльных узаемадзеянняў. Калі дзеці чуюць нешта ад аднагодкаў і тых, з кім ім цікава, яны запамінаюць гэта хутчэй і лягчэй, чым, напрыклад, чуючы тое самае ад настаўніка.

⦿ У працэсе гульні можна навучыцца навыкам зносін, навыкам вядзення перамоваў і развіццю мовы.

⦿ Для стварэння гульняў мы можам выкарыстоўваць прадметы паўсядзённага ўжытку, якія адпавядаюць узросту, напрыклад, скрынкі з-пад шматкоў. Гульні – выдатны спосаб заахвоціць дзяцей вывучаць і выкарыстоўваць новую лексіку на розных мовах.

⦿ Паспрабуйце маркіраваць і, магчыма, выкарыстоўваць розныя колеры для абазначэння кожнай мовы дома. Важна, каб дзеці разумелі, што кожная мова аднолькава каштоўная, як і іншая. Таму рэкамендуецца выкарыстоўваць колеры, каб дапамагчы дзецям адрозніваць адну мову ад іншай. Прадметы хатняга ўжытку таксама можна пазначаць рознымі колерами.

⦿ Даследаванні паказваюць, што ёсць мноства сувязей паміж вывучэннем музыкі і вывучэннем мовы. Пры праслухоўванні музыкі, руху і размове задзейнічаюцца розныя ўчасткі мозгу.

⦿ Музыка можа садзейнічаць захаванню традыцый, мовы і сямейных звычаяў.

Заключэнне

У бацькоў ёсць шмат магчымасцяў для стварэння шматмоўнага асяроддзя дома. Заняткі, якія могуць спрыяць гэтаму, уключаюць у сябе праслухоўванне музыкі, паўсядзённыя актыўнасці, а таксама гульні. 

Апошнія даследаванні мозгу паказалі, што немаўляты здольныя весці статыстыку гукаў, якія яны чуюць, і што развіццё гаворкі адбываецца ў розных частках мозгу. Не варта верыць міфам аб тым, што дзеці блытаюцца ці затрымліваюцца ў развіцці, вывучаючы больш за адну мову дома.

Што такое штучны інтэлект (AI) і якую ролю ён адыгрывае ў навучанні англійскай мове? Якія перавагі дае выкарыстанне AI для планавання урокаў? Якія інструменты AI даступныя для навучання замежнай мове (уключаючы інструменты для навучання лексіцы і граматыцы)? Як інтэграваць AI-згенераваныя практыкаванні ў навучанне? На гэтыя і іншыя пытанні дапамагла знайсці адказы ўдзельнікам курса Крысціна Кейваж – спецыялістка па англійскай мове, выкладчыца, пісьменніца і трэнер для настаўнікаў.

На курсе «Harnessing AI for Effective English Teaching» Крысціны Кейваж настаўнікі пазнаёміліся з самымі папулярнымі AI-платформамі, зразумелі, як прыдумляць з іх дапамогай заданні для школьнікаў і студэнтаў, а таксама навучыліся генераваць навучальныя планы і шмат іншага.

«20 дзён у Марыупалі» – дакументальны фільм украінскага рэжысёра і фотакарэспандэнта Мсціслава Чарнова, які паказвае пачатак баявых дзеянняў у Марыўпалі. Група рэпарцёраў Associated Press прыбывае ў горад за гадзіну да паўнамаштабнага расійскага ўварвання на тэрыторыю Украіны і застаецца там на працягу 20 дзён, фіксуючы ўсё, што там адбываецца (у тым ліку пахаванні мясцовых жыхароў, аблогу і знішчэнне горада расійскімі вайскоўцамі). На 21 дзень вайны журналісты выехалі з Марыупаля па гуманітарным калідоры.

Стужка Мсціслава Чарнова прынесла Украіне першы «Оскар» у гісторыі краіны. Фільм быў уганараваны сёлета ў намінацыі «Найлепшы поўнаметражны дакументальны фільм». Атрымліваючы ўзнагароду, рэжысёр сказаў: 

«Гэта першы “Оскар” ва ўкраінскай гісторыі. Гэта гонар для мяне. Але, верагодна, я першы рэжысёр у гісторыі, які скажа, стоячы на гэтай сцэне: “Хацеў бы я, каб гэтага фільма не было”. Я б аддаў гэтую ўзнагароду, каб Расія ніколі б не нападала на Украіну».

Паказ быў арганізаваны ў супрацы з Беларускім Моладзевым Хабам у Варшаве. Пасля анонсу ў сацсетках мы атрымалі больш за 100 рэгістрацый, таму правялі другі паказ, каб фільм маглі ўбачыць усе ахвочыя.

Карціну прадставіў аўдыторыі беларускі прадзюсар, сябра праўлення Беларускай незалежнай кінаакадэміі Мікалай Лаўранюк, а пасля паказу прайшло абмеркаванне фільма з гледачамі.

17 снежня 2023 года спецыяльна для аўдыторыі Амерыканскага цэнтра медыяэксперт Роберт дэ Шэйд прагуляўся па Нью-Ёрку з камерай, каб паказаць, як упрыгожаны горад.

На відэа вы пабачыце знакамітую Пятую авеню, каткі, святочныя кірмашы і нават самую прыгожую ялінку Нью-Ёрку.

Заходзьце на YouTube-канал Цэнтра, каб пагрузіцца ва ўнікальную святочную атмасферу аднаго з найцудоўнейшых гарадоў планеты!

22 лістапада 1963 года, 60 год таму, абарвалася жыццё самага маладога прэзідэнта ў гісторыі ЗША. Джон Ф. Кенэдзі быў смяротна паранены стрэлам з вінтоўкі падчас візіту ў Тэхас.

Кенэдзі вырас у прывілеяваным раёне Бостана, удзельнічаў у Другой сусветнай вайне, заняўся палітыкай, ажаніўся з прыгожай маладой жанчынай, стаў бацькам дваіх дзяцей і заняў вышэйшую пасаду ў краіне.

Куля забойцы абарвала жыццё і спадчыну прэзідэнта. Як гэта паўплывала на Амерыку? Якія таямніцы хавае гэтая гісторыя? І як забойца Кенэдзі звязаны з Мінскам?

Даведайцеся, паглядзеўшы лекцыю амерыканскага прафесара Дэвіда Голдфілда на нашым YouTube-канале (з рускімі субтытрамі).

American Center Minsk рады прадставіць унікальны лічбавы зборнік, у які ўвайшлі тэксты ўдзельнікаў семінара «Сучасная драматургія». Семінар адбыўся ў кастрычніку 2023 года.

У зборнік увайшлі адзіннаццаць драматургічных твораў. П’есы ўдзельнікаў семінара, напісаныя ў самых розных стылях, даследуюць вечныя тэмы кахання, смутку, памяці і мастацтва. Гэтыя тэксты не толькі агаляюць творчы патэнцыял аўтараў, але і падсвечваюць важную ролю драматургіі ў досведзе суперажывання і супольнасці.

Запрашаем пазнаёміцца з творамі па спасылцы.