24 чэрвеня 1901 нарадзіўся амерыканскі баскетбаліст Чак Тэйлар, які праславіў аднайменную мадэль кед Converse. Converse Chuck Taylor All Star стала самым папулярным і прадаваным баскетбольным абуткам у гісторыі.
Кампанію Converse заснаваў у 1908 годзе Маркус Мілс Конверс і спачатку яна вырабляла разнастайныя тавары з гумы – галёшы, боты, і нават аўтамабільныя шыны. У 1915 годзе кампанія пачала вырабляць спартовы абутак, а ў 1917 – спецыялізаваную серыю кед для баскетбалістаў – Converse All Star.
Converse не выпадкова звярнулі ўвагу на баскетбол. Вынайдзены адносна нядаўна (у 1891-м годзе) у Спрынгфілдзе, менш чым у 100 мілях ад штаб-кватэры Converse, новы від спорту хутка набыў вялікую папулярнасць на Усходнім узбярэжжы. У адрозненне ад амерыканскага футбола і бейсбола, якія патрабавалі вялікіх адкрытых гульнявых пляцовак, у баскетбол можна было гуляць у невялікай зале ці на пляцоўцы. У родным горадзе Converse было шмат навучальных устаноў і вялікая шчыльнасць насельніцтва, таму баскетбол хутка распаўсюдзіўся сярод моладзі. Чак Тэйлар быў у іх ліку.
У 1917 годзе, калі выйшлі Converse All Star, Чак Тэйлар гуляў у баскетбольнай школьнай камандзе Columbus Bull Dogs. Праз два гады, ужо будучы гульцом прафесійнага клуба Akron Firestone Non-Skids, Тэйлар выходзіў на пляцоўку выключна ў конверсах. Гэтыя кеды сталі яго любімым абуткам і ў паўсядзённым жыцці.
Мадэль All Star не была першым баскетбольным абуткам, але яна выгадна вылучалася сярод канкурэнтаў шэрагам асаблівасцяў. Парусінавы верх сумяшчаўся з гумовай падэшвай, а спецыяльная ўстаўка на пятцы, размешчаная на ўнутраным боку, прадугледжвала абарону шчыкалатак ад празмерных нагрузак і патэнцыйных пераломаў.
Тую ж ролю гуляла і знакамітая пасля нашыўка з зоркай, скураная накладка павінна была абараняць шчыкалатку, калі ногі гульца ў палёце сутыкаліся. Яшчэ адна інавацыя Converse – ромбападобны малюнак пратэктара, які не слізгаў і дазваляў спартсмену быць больш манеўраным.
У 1921 годзе Чак Тэйлар далучыўся да Converse спачатку ў якасці прадаўца, а затым і трэнера. На золку развіцця баскетбола многія брэнды стваралі свае ўласныя каманды і адпраўлялі іх у туры па краіне для папулярызацыі тавараў. Каманда Converse называлася All Stars (у гонар новай мадэлі кед) і ўзначаліў яе Чак Тэйлар.
Каманда прыязджала ў новы горад і гуляла супраць мясцовага клуба ці каледжа. Пасля гульні Тэйлар праводзіў бясплатныя майстар-класы для мясцовых баскетбалістаў і трэнераў, даваў рэкамендацыі па спартыўных тэхніках і абутку, у якім лепш гуляць. Пасля такіх майстар-класаў з кліентамі шанец на камерцыйны поспех быў значна вышэйшы. Дзякуючы ўплыву Тэйлара да 1930-х гадоў All Star насілі баскетбалісты па ўсёй Амерыцы. У 1932 году кеды перайменавалі ў Chuck Taylor All-Stars, дадаўшы імя Чака на лагатып.
Падчас Другой сусветнай вайны Чак служыў у войску ЗША, але быў на той момант ужо немалады, таму не ўдзельнічаў у баявых дзеяннях. Тэйлар трэніраваў баскетбольную каманду Wright Field Air-Tecs на базе ВПС ЗША, а таксама распрацоўваў праграмы фізічнай падрыхтоўкі для навабранцаў. All Star стала «афіцыйным» баскетбольным абуткам узброеных сіл ЗША, вайскоўцы трэніраваліся менавіта ў ім.
Да сярэдзіны 50-х гадоў Chuck Taylor All-Star становяцца баскетбольнымі кедамі №1 у ЗША. Чак Тэйлар, як твар брэнда, аб’ездзіў усе Злучаныя Штаты з гэтай мадэллю і набыў тытул «амбасадара баскетбола». У 1968 году Чак патрапіў у Залу баскетбольнай славы, праз год вялікі папулярызатар баскетбола пайшоў з жыцця.
Паступова Converse All-Star як спартовы абутак пачалі прайграваць канкурэнтам з больш тэхналагічнымі мадэлямі і саступаць іншым вытворцам на рынку. Хоць All Star і перасталі быць галоўным баскетбольным абуткам, мадэль «выйшла на вуліцу» і набыла вялікую папулярнасць як сімвал поп-культуры.